IND vs AUS: શું શુભમન ગિલની આગેવાનીમાં ટીમ ઈન્ડિયા તોડશે ઓસ્ટ્રેલિયાનો રેકોર્ડ?

IND vs AUS ભારત અને ઓસ્ટ્રેલિયા વચ્ચેની ત્રણ મેચોની ODI શ્રેણી 19 ઓક્ટોબરથી શરૂ થવા જઈ રહી છે, જેમાં પહેલી મેચ પર્થના ઓપ્ટસ સ્ટેડિયમમાં રમાશે. આ શ્રેણી માટે ચાહકો ખૂબ ઉત્સાહિત છે, કારણ કે રોહિત શર્મા અને વિરાટ કોહલી લાંબા સમય પછી ફરી ટીમમાં પરત ફર્યા છે. બીજી તરફ, શુભમન ગિલ પોતાના કેપ્ટનશીપના ડેબ્યૂ સાથે ઈતિહાસ રચવા ઉત્સુક છે.

ભારત અને ઓસ્ટ્રેલિયા વચ્ચેની સ્પર્ધા હંમેશાં જ રોમાંચક રહી છે, ખાસ કરીને ODI ફોર્મેટમાં. અત્યાર સુધીમાં બંને ટીમો વચ્ચે કુલ 15 દ્વિપક્ષીય ODI શ્રેણી રમાઈ છે, જેમાં ઓસ્ટ્રેલિયા 8 જીત સાથે થોડું આગળ છે, જ્યારે ભારતે 7 શ્રેણી જીતવી છે. આ આંકડો બતાવે છે કે બંને ટીમો વચ્ચે સ્પર્ધા કેટલા સ્તરે સમાન છે.

બંને ટીમો વચ્ચેની પહેલી દ્વિપક્ષીય ODI શ્રેણી 1984માં રમાઈ હતી, જેમાં ઓસ્ટ્રેલિયાએ ભારતને 3-0થી હરાવ્યું હતું. ત્યારથી, બંને ટીમો વચ્ચે સતત ટક્કર જોવા મળી છે. વર્ષો દરમિયાન ભારતે ઘરઆંગણે પોતાના રેકોર્ડમાં નોંધપાત્ર સુધારો કર્યો છે. પરંતુ ઓસ્ટ્રેલિયાની ધરતી પર જીત હાંસલ કરવી હંમેશાં ભારતીય ટીમ માટે પડકારરૂપ રહી છે.

ભારતે અત્યાર સુધીમાં ઓસ્ટ્રેલિયામાં કુલ ત્રણ દ્વિપક્ષીય ODI શ્રેણી રમી છે. તેમાંમાંથી ફક્ત એક શ્રેણી વર્ષ 2019માં ભારતે જીત મેળવી હતી, જ્યારે 2-1થી શ્રેણી પોતાના નામે કરી હતી. બાકીની બે શ્રેણીમાં ભારતને હારનો સામનો કરવો પડ્યો હતો, જેમાં 2016ની શ્રેણીમાં ટીમ ઈન્ડિયાને 4-1થી પરાજય મળ્યો હતો.

આ વખતે, શુભમન ગિલની આગેવાનીમાં ભારતીય ટીમ પાસે પોતાનો વિદેશી રેકોર્ડ સુધારવાની તક છે. ઓસ્ટ્રેલિયામાં ભારતીય ટીમે અત્યાર સુધી 54 ODI મેચો રમી છે, જેમાંથી ફક્ત 14માં જ જીત મેળવી છે, જ્યારે 38માં હારનો સામનો કરવો પડ્યો છે. બે મેચ કોઈ પરિણામ વિના સમાપ્ત થઈ છે. આ આંકડો બતાવે છે કે ઓસ્ટ્રેલિયાના મેદાનો પર ભારત માટે જીતવાનું કામ સરળ નથી રહ્યું.

તેમ છતાં, ટીમ ઈન્ડિયા હાલ સારી ફોર્મમાં છે અને યુવાઓ તથા અનુભવી ખેલાડીઓ વચ્ચેનું સંતુલન ટીમને મજબૂત બનાવી રહ્યું છે. શુભમન ગિલ માટે આ શ્રેણી ખૂબ જ મહત્વપૂર્ણ રહેશે  કારણ કે આ તેમની પહેલી ODI શ્રેણી છે કેપ્ટન તરીકે, અને તેમની સામે વિશ્વની સૌથી શક્તિશાળી ટીમોમાંની એક છે.

ગિલ અને તેમની ટીમ માટે મુખ્ય લક્ષ્ય માત્ર શ્રેણી જીતવાનું નહીં પરંતુ ઓસ્ટ્રેલિયા સામેના ઇતિહાસિક રેકોર્ડને સુધારવાનું પણ રહેશે. જો ટીમ ઈન્ડિયા આ શ્રેણી જીતે છે, તો તે માત્ર શ્રેણી વિજય નહીં પરંતુ ભારતીય ક્રિકેટના નવા યુગની શરૂઆત સાબિત થઈ શકે છે.

IND vs AUS: શું શુભમન ગિલ કેપ્ટન તરીકે ODIમાં ઇતિહાસ રચી શકશે? ફક્ત સચિન તેંડુલકર જ હાંસલ કરી શક્યા છે આ સિદ્ધિ

IND vs AUS: ભારત અને ઓસ્ટ્રેલિયા વચ્ચેની ત્રણ મેચોની ODI શ્રેણી 19 ઓક્ટોબરથી શરૂ થવા જઈ રહી છે, જેમાં શુભમન ગિલ પહેલી વાર આ ફોર્મેટમાં ટીમ ઈન્ડિયાનું નેતૃત્વ કરશે. યુવાન કેપ્ટન તરીકે ગિલ પાસે પોતાની પહેલી ODI મેચને યાદગાર બનાવવા માટે મોટી તક છે. અત્યાર સુધી ભારતીય ટીમ માટે કેપ્ટન તરીકે ODI ફોર્મેટમાં સદી ફટકારનાર એકમાત્ર ખેલાડી સચિન તેંડુલકર રહ્યા છે, અને હવે ગિલ પાસે એ રેકોર્ડની બરાબરી કરવાની તક છે.

ભારતીય ટીમ હાલમાં ઓસ્ટ્રેલિયામાં પહોંચી ગઈ છે અને 17 ઓક્ટોબરે પર્થ સ્ટેડિયમમાં પ્રેક્ટિસ સેશન પણ યોજી ચૂકી છે. ચેમ્પિયન્સ ટ્રોફી 2025ની ફાઇનલ પછી ટીમ ઈન્ડિયા લાંબા વિરામ બાદ ODI ક્રિકેટમાં પાછી ફરશે. આ શ્રેણી માટે રોહિત શર્માને આરામ આપવામાં આવ્યો છે અને તેમની ગેરહાજરીમાં ગિલને નેતૃત્વ સોંપવામાં આવ્યું છે. ટીમના યુવાધન અને અનુભવી ખેલાડીઓ વચ્ચે ગિલ કેવી રીતે સંતુલન સાધે છે તે જોવું રસપ્રદ રહેશે.

2025 વર્ષ શુભમન ગિલ માટે અત્યાર સુધી આંતરરાષ્ટ્રીય કારકિર્દીનું સૌથી મહત્વપૂર્ણ વર્ષ સાબિત થયું છે. ઇંગ્લેન્ડ સામેની ટેસ્ટ શ્રેણીમાં તેમણે કેપ્ટન તરીકે પહેલી જ ઇનિંગમાં સદી ફટકારીને દરેકની ટીકા અને શંકાઓને ખોટી ઠેરવી હતી. ગિલના નેતૃત્વ હેઠળ ટીમ ઈન્ડિયાએ ટેસ્ટ શ્રેણીમાં ઉત્તમ પ્રદર્શન કર્યું હતું, અને હવે બધાની નજર તેમના ODI નેતૃત્વ પર છે.

ભારતીય ક્રિકેટ ઈતિહાસમાં કુલ 27 ખેલાડીઓએ ODI ફોર્મેટમાં ટીમનું નેતૃત્વ કર્યું છે, પરંતુ ફક્ત સચિન તેંડુલકર જ એવા કેપ્ટન છે જેઓએ પોતાની પહેલી ODI મેચમાં સદી ફટકારી હતી. તેંડુલકરે આ સિદ્ધિ હાંસલ કરી હતી 110 રનની સદી સાથે. ગિલ હવે આ રેકોર્ડને સમાન બનાવવા માટે ઉત્સુક છે.

ભારતીય કેપ્ટન તરીકે પહેલી ODI મેચમાં સૌથી વધુ રન બનાવનારા ખેલાડીઓની યાદીમાં સચિન તેંડુલકર 110 રન સાથે ટોચે છે, ત્યારબાદ શિખર ધવન (86), અજિત વાડેકર (67), રવિ શાસ્ત્રી (50) અને અજય જાડેજા (50) છે. ગિલ જો આ યાદીમાં પોતાનું નામ ઉમેરવામાં સફળ રહેશે તો તે તેમની કારકિર્દી માટે એક અનોખી સિદ્ધિ બની રહેશે.

આ શ્રેણીમાં ગિલ પાસે એક અન્ય મોટી સિદ્ધિ હાંસલ કરવાની તક પણ છે. તેઓ ODIમાં પોતાના 3,000 રન પૂરા કરવા ફક્ત 225 રન દૂર છે. અત્યાર સુધી ગિલે 55 ODI મેચોમાં 2,775 રન બનાવ્યા છે. જો તેઓ ઓસ્ટ્રેલિયા સામેની ત્રણ મેચની શ્રેણીમાં આ રન પૂરા કરશે, તો તે ઝડપથી 3,000 રન સુધી પહોંચનારા ભારતીય ખેલાડીઓમાં સ્થાન મેળવે છે.

ભારત અને ઓસ્ટ્રેલિયા વચ્ચેની ODI શ્રેણીની પહેલી મેચ 19 ઓક્ટોબરે રમાશે, ત્યારબાદ બીજી અને ત્રીજી મેચ 23 અને 26 ઓક્ટોબરે યોજાશે. ક્રિકેટપ્રેમીઓની નજર હવે શુભમન ગિલ પર છે કે શું તેઓ પોતાના કેપ્ટનશીપના ડેબ્યૂમાં સદી ફટકારીને સચિન તેંડુલકરનો રેકોર્ડ સમાન કરી ઇતિહાસ રચી શકશે કે નહીં.

Mohsin Naqvi: એશિયા કપ જીત્યા બાદ ભારત ખાલી હાથ, ટ્રોફી વિવાદ વધુ ઘેરો બન્યો

ભારતીય ટીમે એશિયા કપ 2025 જીત્યાને લગભગ ત્રણ અઠવાડિયા થઈ ગયા છે. ફાઇનલમાં, ટીમ ઇન્ડિયાએ પાકિસ્તાનને 5 વિકેટથી હરાવીને નવમી વખત એશિયા કપ ચેમ્પિયન બન્યું. આશ્ચર્યજનક રીતે, ટ્રોફી હજુ સુધી સત્તાવાર રીતે ભારતીય ટીમને સોંપવામાં આવી નથી.

ફાઇનલ પછી, ACC અને PCBના ચેરમેન મોહસીન નકવી ટ્રોફી સાથે દુબઈ જવા રવાના થયા, જેના કારણે ચર્ચા ચાલુ રહી.

હાલમાં ટ્રોફી ક્યાં છે?

ક્રિકબઝના અહેવાલ મુજબ, એશિયા કપ ટ્રોફી હાલમાં દુબઈમાં એશિયન ક્રિકેટ કાઉન્સિલ (ACC) ના કાર્યાલયમાં રાખવામાં આવી છે. જોકે, ટીમ ઇન્ડિયાને ટ્રોફી ક્યારે સોંપવામાં આવશે તે અંગે હજુ સુધી કોઈ સ્પષ્ટ માહિતી નથી.

આગળનો નિર્ણય ક્યારે લેવામાં આવશે?

ACC ની 30 સપ્ટેમ્બરે દુબઈમાં બેઠક થઈ. એવું નક્કી કરવામાં આવ્યું હતું કે પાંચ ટેસ્ટ રમનારા એશિયન દેશો – ભારત, પાકિસ્તાન, શ્રીલંકા, બાંગ્લાદેશ અને અફઘાનિસ્તાન – ના બોર્ડ ટ્રોફી વિવાદ પર ચર્ચા કરશે અને તેનો ઉકેલ લાવશે. આ બેઠક આવતા મહિનાની શરૂઆતમાં ICCની બેઠક સાથે મળવાની છે.

સૂત્રોના જણાવ્યા અનુસાર, જો મોહસીન નકવી આ બેઠકમાં હાજરી નહીં આપે તો વિવાદ વધી શકે છે. તેમણે અગાઉ જુલાઈમાં ICCના વાર્ષિક પરિષદમાં હાજરી આપી ન હતી, અને એવી આશંકા છે કે તેઓ આ વખતે પણ તેમના સ્થાને પ્રતિનિધિ મોકલી શકે છે.

BCCI ની રણનીતિ શું હશે?

અહેવાલ મુજબ, BCCI ના એક અધિકારીએ જણાવ્યું છે કે બેઠક હજુ બાકી છે, અને તે દરમિયાન બોર્ડ આ મુદ્દા પર તેના વિકલ્પો પર વિચાર કરશે. નોંધનીય છે કે મોહસીન નકવીએ તાજેતરમાં કહ્યું હતું કે તેમની પરવાનગી વિના BCCI કે ટીમ ઈન્ડિયાને કોઈ ટ્રોફી સોંપવામાં આવશે નહીં.