IPL 2026: સંજુ સેમસન ઉપરાંત, રાજસ્થાન રોયલ્સે અનેક ખેલાડીઓને રિલીઝ કર્યા; ટીમે લીધો મોટો નિર્ણય

IPL 2026 ની તૈયારીઓ સાથે, રાજસ્થાન રોયલ્સે પોતાના સ્ક્વોડમાં મોટા ફેરફારો કર્યા છે. ટીમે સંજુ સેમસનને ચેન્નાઈ સુપર કિંગ્સમાં ટ્રેડ કરી દીધા બાદ અનેક અન્ય ખેલાડીઓ પર મોટો નિર્ણય લીધો છે. IPL 2025માં નબળું પ્રદર્શન કરનારી રાજસ્થાનની ટીમ આગામી સિઝનમાં સંપૂર્ણ નવી દિશામાં આગળ વધવા ઈચ્છે છે.

વાનિંદુ હસરંગા અને અન્ય મોટા નામોને રિલીઝ

રાજસ્થાન રોયલ્સે આ વખતે ઘણા મોટા નામોને રિલીઝ કર્યા છે. શ્રીલંકન ઓલરાઉન્ડર વાનિંદુ હસરંગા, જેઓ IPL 2025માં ટીમ માટે અસરકારક પ્રદર્શન કરી શક્યા ન હતા, તેમને સ્ક્વોડમાંથી બહાર કરી દેવામાં આવ્યા છે. તેમ સાથે મહેશ તીક્ષ્ણા, આકાશ માધવાલ, ફઝલહક ફારૂકી, કુમાર કાર્તિકેય, કુણાલ રાઠોડ, અને અશોક શર્માને પણ રિલીઝ કરવામાં આવ્યા છે.

ટીમ મેનેજમેન્ટના કહેવા મુજબ, આ બધાં ખેલાડીઓ છેલ્લા સિઝનમાં પ્રભાવ પેદા કરવામાં નિષ્ફળ રહ્યા હતા, જેના કારણે તેઓને આગામી સીઝનની યોજનાઓમાં સ્થાન આપવામાં આવ્યું નથી.

સંજુ સેમસનનો મોટો ટ્રેડ

રાજસ્થાન રોયલ્સે સંજુ સેમસનને ચેન્નાઈ સુપર કિંગ્સમાં ટ્રેડ કર્યો છે. તેમના બદલામાં CSKએ રાજસ્થાનને રવિન્દ્ર જાડેજા અને સેમ કુરન જેવા બે મોટા ઓલરાઉન્ડર્સ આપ્યા છે. આ ટ્રેડ IPL 2026ના સૌથી મોટા ટ્રેડ્સમાંનો એક ગણાય છે. સંજુ સેમસન ગયા સિઝનમાં ઈજાના કારણે મોટા ભાગની મેચોમાં રમ્યા ન હતા અને તેમની ગેરહાજરીમાં રિયાન પરાગે કેપ્ટનશીપ સંભાળી હતી.

IPL 2025નો નિરાશાજનક સીઝન

IPL 2025 રાજસ્થાન રોયલ્સ માટે ખૂબ જ નિરાશાજનક રહ્યો હતો. ટીમે લીગ ચરણ દરમિયાન કુલ 14 મેચ રમી હતી જેમાં માત્ર 4 જીત મેળવી હતી અને 10 મેચમાં હારનો સામનો કરવો પડ્યો હતો. ટીમ અંતે માત્ર 8 પોઈન્ટ સાથે પોઈન્ટ્સ ટેબલમાં 9મા સ્થાન પર રહી હતી. ટીમના બેટિંગ અને બોલિંગ, બન્ને વિભાગોમાં સ્થિરતા ન જોવા મળતા મેનેજમેન્ટ હવે મોટા ફેરફારો તરફ આગળ વધી રહ્યું છે.

હરાજી પહેલાં રાજસ્થાન રોયલ્સ પાસે હવે ₹16.05 કરોડનું ભારે પર્સ બેલેન્સ છે, જેના આધારે ટીમ આગામી નિલામીમાં નવા અને ટોચના ટેલેન્ટ્સ ખરીદવાનો પ્રયાસ કરશે.

રાજસ્થાન રોયલ્સનો ઈતિહાસ અને ભાવિ યોજના

રાજસ્થાન રોયલ્સ IPLની પ્રથમ સિઝન 2008ના વિજેતા રહી ચૂક્યા છે, જ્યારે દિગ્ગજ શેન વોર્નના નેતૃત્વમાં ટીમે ટાઇટલ જીત્યું હતું. ત્યારબાદ ટીમ IPL 2022ની ફાઇનલ સુધી પહોંચી હતી જ્યાં તે ગુજરાત ટાઇટન્સ સામે હારી ગઈ હતી. સંજુ સેમસનની કેપ્ટનશીપ હેઠળ ટીમે ઘણી પ્રગતિ કરી હતી, પરંતુ હવે ટીમ નવા નેતૃત્વ મોડેલમાં આગળ વધવા તૈયાર છે.

જાળવી રાખેલા ખેલાડીઓ

રાજસ્થાન દ્વારા જાળવી રાખેલા મુખ્ય ખેલાડીઓમાં ધ્રુવ જુરેલ, જોફ્રા આર્ચર, રિયાન પરાગ, શિમરોન હેટમાયર, યશસ્વી જયસ્વાલ, તુષાર દેશપાંડે અને નાન્દ્રે બર્ગર જેવા નામો સામેલ છે. આ જ સ્ટ્રોંગ કોર સાથે ટીમ આગામી સિઝનમાં વધુ મજબૂત પ્રદર્શન કરવા ઈચ્છે છે.

IPL 2026: ગુજરાત ટાઇટન્સે IPL 2026 માટે રિટેન રિલીઝ યાદી જાહેર કરી, ફ્રેન્ચાઇઝ પાસે ₹12.9 કરોડનું પર્સ બાકી

IPL 2026 શુભમન ગિલની આગેવાનીમાં ગુજરાત ટાઇટન્સે આવતા IPL 2026 મીની-ઓક્શન પહેલા તેમના રિટેન અને રિલીઝ થયેલા ખેલાડીઓની યાદી જાહેર કરી છે. 2022માં ડેબ્યૂ સીઝનમાં જ ટાઇટલ જીતેલા ગુજરાતે આ વખતે પણ કોર ગ્રુપને યથાવત રાખીને ટીમમાં સ્થિરતા જાળવવાનો પ્રયાસ કર્યો છે. ગયા કેટલાક સીઝનમાં ટીમ સતત મજબૂત દેખાઈ છે અને તેથી મુખ્ય ખેલાડીઓને જાળવી રાખવાનો નિર્ણય લેવાયો છે.

મુખ્ય ખેલાડીઓ પર ફ્રેન્ચાઇઝનો વિશ્વાસ

ગુજરાતે શુભમન ગિલને કેપ્ટન તરીકે ફરી પસંદ કર્યો છે અને તેમની સાથે રાશિદ ખાન, સાઈ સુદર્શન અને જોસ બટલર જેવા મેચ-વિનર્સને પણ યથાવત રાખ્યા છે. બોલિંગ ડિપાર્ટમેન્ટમાં કાગીસો રબાડા, મોહમ્મદ સિરાજ અને પ્રસિદ્ધ કૃષ્ણા જેવા અનુભવી પેસર્સ ટીમને મજબૂતી આપે છે. ઓલરાઉન્ડર્સમાં રાહુલ તેવતિયા, ગ્લેન ફિલિપ્સ અને વોશિંગ્ટન સુંદર મહત્વની ભૂમિકા નિભાવી શકે છે. આ ખેલાડીઓ પર વિશ્વાસ રાખીને ફ્રેન્ચાઇઝ ઇચ્છે છે કે ટીમનું કોર કોમ્બિનેશન તૂટે નહીં અને નવી સીઝનમાં વધુ અસરકારક પ્રદર્શન મળે.

છ ખેલાડીઓને રિલીઝ કરવાનો નિર્ણય

કેટલાક ખેલાડીઓને પૂરતી તક ન મળતા ફ્રેન્ચાઇઝે આ વખતે઼ છ ખેલાડીઓને રિલીઝ કર્યા છે. જેમાં મહિપાલ લોમરોર, કરીમ જનાત, દાસુન શનાકા, ગેરાલ્ડ કોટઝી અને કુલવંત ખેજરોલિયા સામેલ છે. આમાંથી કેટલાંક ખેલાડીઓ બેન્ચ પર વધુ સમય વિતાવતા હતા અને ટીમ કોમ્બિનેશનમાં તેમની ભૂમિકા મર્યાદિત હતી. ઉપરાંત, શેરફેન રધરફોર્ડને ટ્રેડ દ્વારા મુંબઈ ઇન્ડિયન્સને મોકલવામાં આવ્યો છે.

વોશિંગ્ટન સુંદરને રાખીને ટીમનો નિર્ણય સ્પષ્ટ

તાજેતરમાં અહેવાલો હતા કે ગુજરાત વોશિંગ્ટન સુંદરને ટ્રેડ કરવા માંગે છે અને ચેન્નાઈ સુપર કિંગ્સ રસ દાખવી રહી હતી. પરંતુ અંતમાં ફ્રેન્ચાઇઝે તેમને રિટેન કરવાનો નિર્ણય કર્યો છે, જે દર્શાવે છે કે ટીમ તેમને મહત્વપૂર્ણ ઓલરાઉન્ડ વિકલ્પ તરીકે જોતી રહી છે.

Powered by thunder, charged up with lightning for yet another season! ⚡#AavaDe | #TATAIPL2026 | #TATAIPLRetention pic.twitter.com/FRcX24sAVu

— Gujarat Titans (@gujarat_titans) November 15, 2025

IPL 2026 ઓક્શન માટે પર્સ ઉપલબ્ધ

ગયા સીઝન બાદ સ્ક્વોડ સ્ટ્રક્ચરમાં ફેરફાર થતાં ગુજરાત ટાઇટન્સ પાસે હવે મીની ઓક્શન માટે કુલ ₹12.9 કરોડનું પર્સ ઉપલબ્ધ છે. આ રકમનો ઉપયોગ ફ્રેન્ચાઇઝે સ્ક્વોડની ખામી પૂરી કરવા અને બે-ત્રણ સ્ટ્રેટેજિક ખેલાડીઓ ઉમેરવા માટે કરી શકે છે.

રિલીઝ થયેલા ખેલાડીઓ:

શેરફેન રધરફોર્ડ, મહિપાલ લોમરોર, કરીમ જનાત, દાસુન શનાકા, ગેરાલ્ડ કોટઝી, કુલવંત ખેજરોલિયા

રિટેન કરાયેલા ખેલાડીઓ:

શુભમન ગિલ (કેપ્ટન), રાશિદ ખાન, સાઈ સુદર્શન, રાહુલ તેવતિયા, શાહરૂખ ખાન, કાગીસો રબાડા, જોસ બટલર, મોહમ્મદ સિરાજ, પ્રસિદ્ધ કૃષ્ણ, નિશાંત સિંધુ, કુમાર કુશાગ્ર, અનુજ રાવત, માનવ સુથાર, વોશિંગ્ટન સુંદર, અરશદ ખાન, ગુરનુર બ્રાર, સાઈ કિશોર, ઇશાંત શર્મા, જયંત યાદવ, ગ્લેન ફિલિપ્સ

CSK: સંજુ સેમસનને તક ન મળી, CSKએ નવા કેપ્ટનની જાહેરાત કરી; મોટી અપડેટ બહાર આવી

CSK IPL 2026 રીટેન્શન પ્રક્રિયા પૂરી થયા બાદ ચેન્નાઈ સુપર કિંગ્સે પોતાના નવા કેપ્ટનની સત્તાવાર જાહેરાત કરી છે. ગયા સિઝનમાં કેટલીક મેચોમાં મહેન્દ્ર સિંહ ધોનીએ કમાન સંભાળી હતી, પરંતુ આગામી સિઝન માટે ફ્રેન્ચાઇઝીએ મહત્વપૂર્ણ ફેરફાર કર્યો છે. ટીમે આ જવાબદારી ફરીથી રુતુરાજ ગાયકવાડને સોંપવાનો નિર્ણય કર્યો છે.

રીટેન્શન પ્રોસેસ બાદ તમામ ફ્રેન્ચાઇઝીઝે પોતાના રીટેન તથા રિલીઝ ખેલાડીઓની યાદી જાહેર કરી દીધી છે. ત્યારબાદ CSK દ્વારા ગાયકવાડને કેપ્ટન બનાવવાની જાહેરાત સાથે અનેક અટકળોનો અંત આવ્યો છે. રુતુરાજ અગાઉ પણ CSKના કેપ્ટન રહી ચૂક્યા છે અને ટીમ મેનેજમેન્ટ તેમની લીડરશીપ કાબેલિયતથી સંતોષિત છે.

સંજુ સેમસનનો મોટો ટ્રેડ, છતાં કેપ્ટન નહીં

ચેન્નાઈ સુપર કિંગ્સે રવિન્દ્ર જાડેજા અને સેમ કુરન જેવા બે મોટા ખેલાડીઓના બદલામાં સ્ટાર વિકેટકીપર-બેટ્સમેન સંજુ સેમસનને ટ્રેડ દ્વારા પોતાની ટીમમાં જોડ્યા હતા. આ ટ્રેડ બાદ ક્રિકેટ જગતમાં એવી ચર્ચાઓ શરૂ થઈ હતી કે CSK સંજુને આગામી કેપ્ટન તરીકે પસંદ કરી શકે છે. કારણ કે સેમસન 2021 થી 2024 સુધી રાજસ્થાન રોયલ્સના કપ્તાન રહ્યાં અને તેમની આગેવાનીમાં ટીમ IPL 2022ની ફાઇનલ સુધી પહોંચી હતી. તેમ છતાં, CSKએ ગાયકવાડ પર જ પોતાનો વિશ્વાસ જાળવ્યો છે.

ગયા સિઝનમાં રુતુરાજની ઈજા, ધોનીએ સંભાળી હતી કમાન

ગયા IPL સિઝનમાં રુતુરાજ ગાયકવાડ ઈજાને કારણે ટીમની બહાર થઈ ગયા હતા. તેમની ગેરહાજરીમાં ચેન્નાઈ સુપર કિંગ્સની કમાન ફરી એકવાર દિગ્ગજ કેપ્ટન મહેન્દ્ર સિંહ ધોનીએ સંભાળી હતી. ધોની હાલમાં 43 વર્ષના છે અને IPLમાં તેમના ભવિષ્ય અંગે સતત ચર્ચા ચાલી રહી છે. તેથી એવું માનવામાં આવતું હતું કે સંજુ સેમસન ટીમના નવા કેપ્ટન તરીકે પસંદ થઈ શકે. પરંતુ CSK મેનેજમેન્ટે સ્પષ્ટ કર્યું છે કે ટીમની લાંબા ગાળાની યોજનામાં રુતુરાજ જ પ્રથમ પસંદગી છે.

રુતુરાજ ગાયકવાડનું લીડરશીપ રેકોર્ડ

રુતુરાજ ગાયકવાડે IPLમાં અત્યાર સુધી CSKની તરફથી કુલ 19 મેચમાં કેપ્ટનશીપ કરી છે. જેમાંથી ટીમને 8 જીત મળી છે જ્યારે 11 મેચમાં હારનો સામનો કરવો પડ્યો છે. હવે CSK મેનેજમેન્ટને આશા છે કે ગાયકવાડ આગામી સિઝનમાં ટીમને વધુ મજબૂત પ્રદર્શન તરફ દોરી જશે.

IPL 2025માં CSKનો નિરાશાજનક પરફોર્મન્સ

CSK IPLના ઈતિહાસમાં સૌથી સફળ ટીમોમાંથી એક રહી છે અને ધોનીની આગેવાનીમાં પાંચ વખત ટ્રોફી જીતી છે. છતાં IPL 2025માં ટીમનું પ્રદર્શન નિરાશાજનક રહ્યું હતું. CSKએ સિઝનમાં કુલ 14 મેચ રમી જેમાંથી માત્ર 4માં જીત મેળવી હતી. ટીમ પાસે માત્ર 8 પોઈન્ટ હતા અને તેનો નેટ રન રેટ -0.647 હતો. આ ખરાબ પ્રદર્શન પછી CSK આગામી સિઝનમાં નવી ઉર્જા અને નવી લીડરશીપ સાથે પાછી ફરવા માગે છે.