Rohit Sharma Retire: રોહિત શર્માએ ટેસ્ટ ક્રિકેટમાંથી નિવૃત્તિ લીધી, ભાવુક પોસ્ટ સાથે કહ્યું અલવિદા

Rohit Sharma Retire: રોહિત શર્માએ 2013 માં ટેસ્ટ ક્રિકેટમાં ડેબ્યૂ કર્યું હતું અને 2019 માં ટીમ ઈન્ડિયાનો ઓપનર બન્યો હતો, ત્યારબાદ તે ટીમમાં કાયમી સ્થાન બનાવવામાં સફળ રહ્યો હતો. ૨૦૨૨ માં, તેમને ટેસ્ટ ટીમની કમાન મળી.

Rohit Sharma Retire: ટીમ ઈન્ડિયાના કેપ્ટન રોહિત શર્માએ નિવૃત્તિની જાહેરાત કરી છે. ટીમ ઈન્ડિયાના દિગ્ગજ ઓપનર અને બે ફોર્મેટમાં કેપ્ટન, રોહિતે ટેસ્ટ ક્રિકેટમાંથી નિવૃત્તિની જાહેરાત કરી છે. હિટમેન તરીકે જાણીતા રોહિતે બુધવાર, 7 મેના રોજ સોશિયલ મીડિયા પોસ્ટ દ્વારા લાંબા ફોર્મેટના ક્રિકેટને અલવિદા કહ્યું. રોહિતની નિવૃત્તિના સમાચાર એવા સમયે આવ્યા જ્યારે પસંદગી સમિતિએ તેમને ટેસ્ટ ટીમના કેપ્ટન પદ પરથી દૂર કરવાનો નિર્ણય લીધો હતો અને ઇંગ્લેન્ડ પ્રવાસ પર તેમને ટીમમાં સ્થાન મળવાની કોઈ શક્યતા દેખાતી ન હતી.

રોહિત શર્માએ નિવૃત્તિ પર શું કહ્યું?

રોહિત શર્માએ ઈન્સ્ટાગ્રામ પર એક સ્ટોરી પોસ્ટ કરીને સંન્યાસની જાહેરાત કરી છે. આ સ્ટોરીમાં તેમણે પોતાની 280 નંબરની ટેસ્ટ કેપની તસવીર શેર કરી અને લખ્યું:

“હું તમને જણાવવા માંગુ છું કે હું હવે ટેસ્ટ ક્રિકેટમાંથી નિવૃત્તિ લઈ રહ્યો છું. સફેદ કપડાંમાં મારા દેશનું પ્રતિનિધિત્વ કરવું મારા માટે એક મોટો ગૌરવ રહ્યો છે. આટલા વર્ષો સુધી આપેલ પ્રેમ અને સમર્થન બદલ આપ સૌનો દિલથી આભાર.”

ટીમ ઈન્ડિયાના દિગ્ગજ બેટ્સમેન રોહિત શર્માએ એક સ્પષ્ટતા પણ કરી છે કે તેઓ હાલમાં વનડે ફોર્મેટમાં રમવાનું ચાલુ રાખશે. તેમણે કહ્યું:

“હું વનડે ફોર્મેટમાં ભારતનું પ્રતિનિધિત્વ કરતો રહીશ.”

કપ્તાનીમાંથી હટાવવાનો નિર્ણય લેવાયો હતો

છેલ્લાં થોડા મહિનાઓથી રોહિત શર્માના ટેસ્ટ ક્રિકેટના ભવિષ્યને લઈને અનેક પ્રશ્નો ઉઠી રહ્યા હતા. ખાસ કરીને તેમની કપ્તાની પર તો સતત પ્રશ્નચિહ્ન હતું. ગયા વર્ષે ન્યુઝીલેન્ડ સામે ઘરે 0-3થી ક્લીન સ્વીપ મળ્યા બાદ અને ત્યારપછી ઓસ્ટ્રેલિયા પ્રવાસ પર પણ ટીમને હારનો સામનો કરવો પડ્યો હતો, ત્યારથી એવું લાગી રહ્યું હતું કે રોહિત માટે આગલી ટેસ્ટ સિરીઝમાં કપ્તાની જાળવી રાખવી મુશ્કેલ થશે.

રોહિતને આશા હતી કે તેઓ ઈંગ્લેન્ડ પ્રવાસમાં કપ્તાની કરશે, પરંતુ મંગળવાર, 6 મેના રોજ સિલેક્શન કમિટી દ્વારા તેમને કપ્તાનીમાંથી હટાવવાનો નિર્ણય લઈ લેવાયો હતો અને તે અંગે બીસીસીઆઈને પણ જાણ કરવામાં આવી હતી.

2013માં ડેબ્યુ, 2019માં કારકિર્દીનો ટર્નિંગ પોઈન્ટ

આ સ્થિતિમાં રોહિતનું ટીમમાં સ્થાન મેળવવું પણ અશક્ય લાગતું હતું, કારણ કે છેલ્લા એક વર્ષથી ટેસ્ટ ફોર્મેટમાં તેમનો ફોર્મ ખૂબ નબળો રહ્યો હતો. તેથી રોહિત શર્મા, જેને ક્રિકેટપ્રેમીઓ ‘હિટમેન’ તરીકે ઓળખે છે,એ આ ફોર્મેટથી સન્યાસ લેવાનો નિર્ણય લીધો.

રોહિતે 2013માં વેસ્ટઈન્ડિઝ સામે પોતાના ટેસ્ટ ડેબ્યુમાં શતક ફટકાર્યો હતો અને પોતાના બીજા મેચમાં પણ સેન્ટ્યુરી ફટકારી ખાસ સિદ્ધિ હાંસલ કરી હતી. જોકે, ત્યાર બાદના 6 વર્ષમાં તેઓ સતત સંઘર્ષ કરતા રહ્યા અને ટીમમાંથી અંદર-બહાર થતા રહ્યા.

પછી 2019માં દક્ષિણ આફ્રિકા સામે ઘરના ટેસ્ટ સીરિઝમાં રોહિતને પહેલીવાર ઓપનર તરીકે મોકો મળ્યો અને ત્યાંથી તેમનો ટેસ્ટ કરિયર બદલાઈ ગયો. તેમણે પહેલો મેચ જ બંને ઇનિંગમાં શતક ફટકાર્યા અને ત્રીજા ટેસ્ટમાં ડબલ સેન્ટ્યુરી પણ ફટકારી. ત્યારબાદ તેઓ ટીમના સ્થાયી ઓપનર બન્યા અને અનેક યાદગાર ઇનિંગ્સ રમ્યા.

2022માં વિરાટ કોહલીના રાજીનામા બાદ રોહિતને ટીમ ઈન્ડિયાનો ટેસ્ટ કપ્તાન બનાવાયો હતો. રોહિતે કુલ 67 ટેસ્ટ મેચ રમ્યા જેમાં તેમણે 4301 રન બનાવ્યા. તેમનો સરેરાશ 40.57 રહ્યો અને તેમણે 12 સેન્ટ્યુરી અને 18 ફિફ્ટી ફટકાર્યા. રોહિતે બોલિંગમાં પણ 2 વિકેટ પોતાના નામે કરી.