IND vs ENG 4th Test: નવા ખેલાડીઓને ટીમમાં સ્થાન મળવાની શક્યતા

IND vs ENG 4th Test: ભારત અને ઇંગ્લેન્ડ વચ્ચેનો ચોથો ટેસ્ટ 23 જુલાઈથી મેનચેસ્ટર (ઓલ્ડ ટ્રાફર્ડ ક્રિકેટ ગ્રાઉન્ડ)માં રમાશે. ઈંગ્લેન્ડ સિરીઝમાં 2-1થી આગળ છે. ભારત માટે આ મુકાબલો ‘કરો અથવા મરો’ જેવી સ્થિતિનો છે.

IND vs ENG 4th Test: ઈંગ્લેન્ડના સ્પિનર શોઐબ બશીર સત્તાવાર રીતે ચોથા અને પાંચમા ટેસ્ટમાંથી બહાર થઈ ગયા છે. તેઓ ત્રીજા ટેસ્ટ દરમિયાન ઈજાગ્રસ્ત થયા હતા. માનવામાં આવી રહ્યું હતું કે ભારત માટે ચોથા ટેસ્ટમાં અર્ષદીપ સિંહ ડેબ્યુ કરી શકે છે, પરંતુ હવે એ અશક્ય લાગે છે. અભ્યાસ દરમિયાન અર્ષદીપના હાથમાં કાપ આવ્યો હતો, જેના કારણે તેને ટાંકા પણ લેવા પડ્યા હતા.

ઋષભ પંત ત્રીજા ટેસ્ટના પહેલાના દિવસે જ ઇજાગ્રસ્ત થઈ ગયા હતા. તેમની આંગળીમાં ઈજા થવા કારણે તેઓ મેદાન છોડી ગયા હતા અને આખા ટેસ્ટ દરમિયાન ફક્ત બેટિંગ જ કરી હતી. ચોથા ટેસ્ટમાં તેમનું રમવું મુશ્કેલ લાગી રહ્યું છે. જો તેઓ રમે તો ફક્ત બેટ્સમેન તરીકે જ મેદાનમાં ઉતરી શકે છે. શક્યતા છે કે તેઓ વિકેટકીપિંગ નહીં કરે.

રવિવાર સાંજે નિતીશ કુમાર રેડ્ડી ઈજાગ્રસ્ત થયાની ખબરથી ચાહકો નિરાશ થયા હતા. આ ટીમ ઈન્ડિયા માટે મોટો ઝટકો છે. 22 વર્ષના ઓલરાઉન્ડર નિતીશને લઈને એવી જાણકારી મળી છે કે તેઓ ફક્ત ચોથા જ નહીં, પણ પાંચમા ટેસ્ટમાંથી પણ બહાર થઈ ગયા છે. તેમને જિમમાં ટ્રેનીંગ દરમિયાન ઘૂંટણમાં ઈજા પહોંચી. સ્કેન દરમિયાન જાણવા મળ્યું કે તેમનું લિગામેન્ટ ડેમેજ થયું છે.

આકાશદીપને બીજા ટેસ્ટમાં મોકો મળ્યો હતો અને તેમણે 10 વિકેટ લઈ ભારતની જીતમાં મહત્વપૂર્ણ ભૂમિકા ભજવી હતી. પરંતુ ચોથા ટેસ્ટમાં તેમનું રમવું મુશ્કેલ લાગી રહ્યું છે. મળતી માહિતી અનુસાર આકાશદીપના ગ્રોઇનમાં ઈજા થઈ છે.

ચોથા ટેસ્ટમાં નિતીશ કુમાર રેડ્ડીની જગ્યાએ શાર્દુલ ઠાકુરને પ્લેઈંગ ઈલેવનમાં સામેલ કરી શકાય છે. શાર્દુલે પહેલા ટેસ્ટમાં સતત 2 બોલ પર 2 વિકેટ પણ લીધા હતા. તેઓ બેટિંગમાં પણ મહત્વની ભૂમિકા ભજવે છે, તેથી મેનચેસ્ટરમાં રમાનારા ચોથા ટેસ્ટમાં તેમને પ્લેઈંગ ઈલેવનમાં સ્થાન મળી શકે છે.

ભારતની ઝડપી બોલિંગને લઈ ચિંતા યથાવત છે, તેથી એવું માનવામાં આવી રહ્યું છે કે  જસપ્રીત બુમરાહ ચોથા ટેસ્ટમાં રમે તેવી સંભાવના છે. અર્શદીપ અને આકાશદીપ ઈજાગ્રસ્ત થયા બાદ ટીમમાં સામેલ કરાયેલા અંશુલ કંબોજને ચોથા ટેસ્ટની પ્લેઇંગ ઇલેવનમાં જો સામેલ થાય તો એ આશ્ચર્યજનક નહીં હોય. તેમને મોકો મળી શકે છે.

ત્રીજા ટેસ્ટમાં ઋષભ પંત મેદાનમાંથી પાછા ફર્યા પછી ધ્રુવ જુરેલે વિકેટકીપિંગ કરી હતી. ઋષભ પંતને લઈને એવું માનવામાં આવી રહ્યું છે કે તેઓ ચોથા ટેસ્ટમાં રમે તો ફક્ત બેટ્સમેન તરીકે જ રમશે. રિપોર્ટ મુજબ એ પણ સંભાવના છે કે કે.એલ. રાહુલ પણ વિકેટકીપિંગ ન કરે. આવી સ્થિતિમાં ધ્રુવ જુરેલને ફરી તક મળી શકે છે.